दुर्गा प्रसाईं पक्राउ परेका छन् । जिल्ला प्रहरी परिसर काठमाडौं र काठमाडौं उपत्यका अपराध अनुसन्धान कार्यालयको टोलीले भक्तपुरस्थित उनकै घरबाट प्रसाईंलाई पक्राउ गरेको हो ।
हिंसा भड्किने गरी अराजक गतिविधि गर्न अभिव्यक्ति दिएको आरोपमा उनलाई सोमबार मध्यरातमा पक्राउ गरिएको प्रहरीले बतायो ।
यसअघि १५ चैतको हिंसात्मक आन्दोलनपछि पक्राउ परेका प्रसाईं अदालतको आदेशपछि छुटेका थिए । राजावादी गतिविधिमा संलग्न प्रसाईं बैंकबाट लिएको ऋण मिनाहा गरिदिनुपर्ने लगायत माग राख्दै आन्दोलनको तयारीमा थिए ।
प्रसाईंले आन्दोलन गरेर देशै ठप्प पार्ने भन्दै अभिव्यक्ति दिइरहेका थिए । नागरिक बचाउ महाअभियानका संयोजकसमेत रहेका प्रसाईंले सोमबार मात्रै पत्रकार सम्मेलन गरी प्रधानमन्त्रीले बोलाए मात्र सरकारसँग वार्तामा बस्ने बताएका थिए । सरकारले आफूहरूका माग पूरा नगरे मंसिर ७ देखि आन्दोलन शुरू गर्ने उनको चेतावनी थियो ।
प्रधानमन्त्री सुशीला कार्कीसँग मात्र वार्तामा बस्ने भन्दै उनले गृहमन्त्रीसँग वार्तामा बस्न अस्वीकार गरेका थिए । कात्तिक २६ गते प्रसाईंका सहयोगीहले गृहमन्त्री ओमप्रकाश अर्यालसँग वार्ता गरेका थिए ।
किराँत, बौद्धसहितको सनातन हिन्दु राष्ट्र घोषणा, गरिबको ऋण मिनाहालगायत २७ बुँदे मागसहित प्रसाईंले मंसिर ७ देखि आन्दोलन गर्ने घोषणा गरेका छन् । प्रसाईंले यसपटक आफूहरूको आन्दोलन पूर्वपश्चिम महेन्द्र राजमार्ग केन्द्रित हुने बताएका छन् ।
यसअघि प्रसाईं नेतृत्वको अभियानले सरकारसमक्ष २७ बुँदे माग पेश गरेको थियो । गृहमन्त्री ओमप्रकाश अर्याललाई भेटी गत बुधबार २७ बुँदे माग पेश गरिएको थियो ।
