काठमाडौं । नेपाली कांग्रेसका महामन्त्रीद्वय गगन थापा र विश्वप्रकाश शर्माले फागुन २१ अघि पार्टीले महाधिवेशन नगरे चुनाव नलड्ने बताएका छन्।
सभापति शेरबहादुर देउवानिकट २८ जना केन्द्रीय सदस्यहरूसँग छलफल गर्दै महामन्त्रीद्वय थापा र शर्माले चुनावअघि नियमित वा विशेष जुन महाधिवेशन गरेर भए पनि नेतृत्व परिवर्तन गर्नुपर्नेमा जोड दिएका हुन्। महाधिवेशन नभए फागुन २१ को चुनाव नलड्ने उनीहरुले प्रष्ट पारेका हने ।
‘महामन्त्रीद्वयले चुनावअघि महाधिवेशन भएन भने हामी चुनाव लड्दैनौं भन्ने कुरा गर्नुभयो,’ भेटमा सहभागी रहेका केन्द्रीय सदस्य आङगेलु शेर्पाले भने । ‘चुनावअघि महाधिवेशन गरेर जानुपर्छ भन्ने थापा र शर्माको मत रहेको पनि उनले बताए ।
देउवानिकट २८ केन्द्रीय सदस्यले पनि चुनावअघि महाधिवेशन गर्नुपर्ने बताइरहेका छन्। उनीहरूले सभापति देउवा, कार्यवाहक सभापति पूर्णबहादुर खड्का र दुवै महामन्त्रीसँग नियमित महाधिवेशन कार्यतालिका ल्याउन आग्रह गरेका छन। सभापति देउवा पक्षका केही पदाधिकारी र केही पूर्वपदाधिकारी चुनावपछि वैशाखमा मात्रै १५ औं महाधिवेशन गर्ने पक्षमा छन्।
कांग्रेसमा चुनावअघि महाधिवेशन गर्ने कि पछि, नियमित गर्ने कि विशेष भन्ने विवाद छ। यसबारे निर्णय गर्न शनिवार केन्द्रीय समिति बैठक बस्दैछ।
