बोमलाल गिरी
नवलपुर, मंसिर ९ गते । नयाँ बनेको पूर्वपश्चिम राजमार्ग अन्तर्गत नारायणघाट–बुटबल सडक खण्डमा दिनहुँजसो सवारी दुर्घटना हुन थालेपछि प्रहरीले तिब्र गति जाँचलाई तिब्रता दिएको छ ।
सवारी साधनको गति मापन गर्ने यन्त्र ‘राडर गन’ मार्फत जिल्ला ट्राफिक प्रहरी कार्यालयले कावासोतकिो खरकट्टा जंगलमा गरेको तिब्र गति अनुगमनमा आइतबार र सोमबार दुईमै ५५ जना चालक कारवाहीमा परेका छन् ।
राडर गनमार्फत ट्राफिक प्रहरीले टाढाबाट आउँदै गरेको सवारी साधनको गति मापन गर्ने गर्छ । सडक विभागले तेकेको मापदण्ड अनुसार गाउँबस्ती र बजार क्षेत्रमा प्रति घण्टा ४० किलोमिटर र जंगल क्षेत्रमा प्रति घण्टा ६० किलोमिटर भन्दा बढी गतीमा सवारी चलाउन पाइदैन ।
कारवाहीमा परेकाहरुलाई पाँच सय देखि १५ सय रुपियाँसम्म जरिवाना गरिएको जिल्ला ट्राफिक प्रहरी कार्यालयका वरिष्ठ नायव निरीक्षक विनोदप्रसाद जोशीले जानकारी दिए । पहिलो पटक कारवाहीमा पर्नेलाई पाँच सय रुपैयाँ, दोस्रो पटक कारवाहीमा पर्नेलाई एक हजार तेस्रो पटक पर्नेलाई १५ सय गरी जरिवाना रकम बढ्दै जानेछ । यसरी कारवाहीमा पर्नेहरुले एक घण्टाको क्लास पनि लिनु पर्ने जोशीले बताए ।
हेर्नुहोस् भिडियो
त्यसैगरी ट्राफिक प्रहरीले सवारी दुर्घटना बढेपछि मादक पदार्थ सेवन (मापसे) र लागू पदार्थ सेवन (लापसे) पनि चेकिङ्ग बढाएको जनाएको छ । अहिले सडक फराकिलो र लेनविहिन भएपछि नवलपुरमा तिब्र गतिका कारण दैनिकजसो सवारी दुर्घटना हुन थालेको छ ।
