आगामी वर्ष २०२६ मा भारत र श्रीलङ्काले संयुक्त रूपमा आयोजना गर्न लागेको टी२० विश्वकपमा नेपालको समूहमा वेस्ट इन्डिज, बाङ्ग्लादेश, इङ्ग्ल्यान्ड र इटली परेको छ।
अन्तर्राष्ट्रिय क्रिकेट परिषद् आईसीसीले मंगलबार सार्वजनिक गरेको ड्र अनुसार समूह सीमा परेको हो। नेपाली समर्थकको लागि खुसीको खबर के छ भने नेपाल रहेको उक्त समूहको खेल भारतमा हुने भएको छ।
ओमानमा सम्पन्न विश्वकप छनोटबाट छानिएदेखि नै नेपालको खेल कुन देशमा हुने र कोको प्रतिद्वन्द्वी रहेको समूहमा पर्ने भन्ने चासोको विषय बनेको थियो।
नेपाल लगातार दोस्रो पटक र समग्रमा तेस्रो पटक २० ओभरको विश्वकप खेल्दै छ। नेपालले इङ्ग्ल्यान्ड र इटलीलाई पहिलो पटक सामना गर्न लागेको हो। इङ्ग्ल्यान्ड विश्व वरीयतामा शीर्ष १० भित्र रहेर सीधै विश्वकप प्रवेश गरेको टोली हो भने इटली युरोपबाट छनोट भएर पहिलो पटक विश्वकपमा पुगेको हो।
वेस्ट इन्डिजसँग नेपालले हालै यूएईमा गएर तीन वटा खेलको टी२० शृङ्खला खेलेको थियो। पहिलो भेटमै उसले उक्त शृङ्खला २, १ ले जित्न सफल भएको थियो। भलै वेस्ट इन्डिजको त्यो पहिलो रोजाइको टीम थिएन।
बाङ्ग्लादेशसँग भने यसअघिको दुवै संस्करणमा नेपालको भेट भएको थियो। अमेरिका र वेस्ट इन्डिजमा गत संस्करणको विश्वकपमा नेपाल बाङ्ग्लादेशसँग २१ रनले पराजित हुन पुगेको थियो।
वेस्ट इन्डिजमा खेलिएको उक्त खेलमा नेपालले बाङ्ग्लादेशलाई १०६ रनमा नै रोकेर सनसनी मच्चाएको थियो। जिततिर अग्रसर रहेर पनि अन्ततः नेपाली टोली ८५ रनमा समेटिन पुगेको थियो।
