नेपाल प्रिमियर लिग (एनपीएल)को दोस्रो संस्करणको खेलमा सट्टेबाजी गराएको आरोपमा एक भारतीय सहित दुई जना पक्राउ परेका छन् ।
पक्राउ पर्नेमा हरियाणा रानिमहाल पानीपतका २८ वर्षीय दिलप्रित सिंह र बर्दिया घर भई भारत चण्डिगढ बस्ने २४ वर्षीया रेविका सिंह ठकुरी छन् । ठकुरी भारतको चण्डीगढ बस्ने गरेको अनुसन्धाबाट खुलेको छ।
एनपीएल दोस्रो संस्करणको क्रिकेट प्रतियोगितामा सहभागी खेलाडीलाई स्पोन्सर गर्छौं भनी सामाजिक सञ्जाल ह्वाट्सएप र इन्स्टाग्राममार्फत सम्पर्क गरी सट्टेबाजी गराउन खोज्ने उनीहरुलाई काठमाडौँ उपत्यका अपराध अनुसन्धान कार्यालयको प्रहरी टोलीले लाजिम्पाटबाट पक्राउ गरेको हो।
यो समूहले एक खेलाडीलाई रन आउट हुन प्रस्ताव गरेका थिए । रन आउट भइदिएबापत ती खेलाडीलाई एक करोड रुपैयाँ दिने प्रस्ताव गरिएको थियो । तर ती खेलाडीले मानेनन् । यसबारे प्रहरीलाई जानकारी गराए । प्रहरीले यो सबै सूचना लिएपछि म्याचफिक्सिङको प्रस्ताव गर्ने उनीहरू पक्राउ परेका हुन् ।
अनुसन्धान अधिकृतका अनुसार अहिले पक्राउ परेकी युवतीले नै इन्टाग्राममार्फत एनपीएल खेल्ने ६/७ जना खेलाडीलाई सम्पर्क गरेकी थिइन् । उनले आफूले खेलाडीहरूलाई स्पोन्सर गर्ने गरेको बताएकी थिइन् । म्यासेज गरिएकामध्ये एक खेलाडीले ती युवतीलाई जवाफ पनि फर्काएको पाइएको छ ।
त्यसपछि ३० कात्तिकमा ती युवती अर्का युवक दिलप्रितलाई लिएर काठमाडौंमा आएकी थिइन् । काठमाडौं आएपछि रिप्लाई गरेका ती खेलाडीलाई पुन: युवतीले सम्पर्क गरी होटलमा भेट्न बोलाइन् । तर खेलाडीले आफू बाहिर जान नमिल्ने भन्दै आफू बसेकै होटलमा बोलाएका थिए ।
१ मंसिरमा खेलाडी र म्याचफिक्सिङको प्रस्ताव गर्ने युवती र भारतीय युवकबीच भेट भएको प्रहरी अनुसन्धानबाट समेत खुलेको छ । उनीहरुमाथि थप अनुसन्धान र आवश्यक कारबाहीका लागि जिल्ला प्रहरी परिसर काठमाडौँको जिम्मा लगाइएको कार्यालयका प्रहरी उपरीक्षक काजीकुमार आचार्यले जानकारी दिए।
