बंगलादेशले हाल भारतमा बसोबास गरिरहेका पूर्वप्रधानमन्त्री शेख हसिना र पूर्वगृहमन्त्री असदुज्जमान खान कमलको सुपुर्दगीको माग गरेको छ। बंगलादेशको अन्तर्राष्ट्रिय फौजदारी न्यायाधिकरणले सोमबार मात्र हसिना र खानविरुद्ध मृत्युदण्डको सजाय सुनाएको छ।
बंगलादेशले आधिकारिक रूपमा शेख हसिना फिर्ताका लागि अनुरोध गर्ने धेरै पत्र पठाइसकेको छ। तर भारतले अहिलेसम्म यसको कुनै जवाफ दिएको छैन।
बंगलादेशमा सन् २०२४ अगस्ट ५ का दिन विद्यार्थी नेतृत्वको विद्रोह उग्र बनेपछि हसिना १५ वर्षे लामो शासन सत्ता त्याग्दै हेलिकप्टर चढेर देशबाटै भागेकी थिइन्। त्यसयता उनी भारको शरणमा छिन्। त्यसबेला विद्यार्थी आन्दोलनमा हसिना नेतृत्वको तत्कालीन सरकारले बल प्रयोग गर्दा झन्डै १ हजार ४ सय जना मारिएका थिए।
फैसलामाथि टिप्पणी गर्दै हसिनाले पक्षपाती, राजनीतिक रूपमा प्रेरित र लोकतान्त्रिक जनादेश बिनाको धाँधलीपूर्ण अदालतद्वारा जारी गरिएको बताएकी छन् ।फैसलापछि हसिना नेतृत्वको अवामी लिगले आज मंगलबार बंगलादेश बन्दको आह्वान गरेको छ । ठाउँठाउँमा हसिना पक्षधर र विरोधीहरूले प्रदर्शन गरिरहेका छन् ।
