बोमलाल गिरी
नवलपुर, मंसिर १० गते । नवलपुर सदरमुकाम कावासोतीमा एकै घरका सात जनालाई रातभर बन्धक बनाएर लुटपाट गरेको आठ दिन बितिसक्दा पनि प्रहरीले अहिलेसम्म लुटेरा पत्ता लगाउन सकेको छैन । गत मंसिर २ गते राति कावासोती–८ कैलास चोकका ४६ वर्षीय सञ्जय खड्काको घरका सात जनालाई बन्धक बनाएर लुटपाट गरिएको थियो ।
जिल्ला प्रहरी कार्यालयमा शंकाष्पद व्यक्तिको किटानी जाहेरी दिँदा पनि प्रहरीले अहिलेसम्म लुटेरा पत्ता लगाउन नसकेको खड्काले बताए । लुटेला पत्ता लाग्न नसक्दा परिवारमा झन त्रास फैलिएको उनको भनाइ छ ।
तर प्रहरीले भने खोजिकार्यलाई तिब्रता दिए पनि अहिलेसम्म सफलता हात नपरेको बताएको छ । जिल्ला प्रहरी कार्यालय प्रमुख, प्रहरी उपरीक्षक युवराज खड्काले भने, ‘‘हामीले खोजी गर्ने कामलाई तिब्रता दिएका छौं, केही शंकाष्पद् व्यक्तिहरुलाई पक्रेर केरकार गर्ने काम पनि भईरहेको छ तर अहिलेसम्म परिणाम हात परेको छैन ।’’
पीडित खण्डकाका अनुसार मास्क लगाएर पेस्तोल, चक्कु र पेट्रोलसहित आएका दुई जनाले परिवारका सदस्यहरुलाई घरभित्रै ७ घण्टा बाँधेर कुटपिट गर्दै मोवाइल र सुनका बाला लुटेका थिए । लुटेराहरुले सुरुमा आफूहरु प्रहरी भएको, अत्याधुनिक हतियारसहित आएको बताउँदै एउटै कोठामा बस्न भन्दै हस्तलिखित पक्राउ पुर्जि पनि थमाएका थिए । तर उनीहरुले पछि आफूहरुलाई सामाजिक अभियान्ता र त्यसपछि मिटर ब्याजीहरुको खोजीमा आएको बताएका खड्काले बताए ।
परिवारका सबै सदस्यलाई एउटै कोठामा थुन्नु र पेट्रोलसहित आउनुले उनीहरु सामुहिक हत्या गरी लुटपाट गर्ने उद्देश्यले आएको खड्काले आशंका गरेका छन् । आफूहरुलाई बाधेपछि उनीहरुले बहिनीलाई दुब्र्यवहारको प्रयाससमेत गरेको खड्काले बताए ।
प्रहरीका अनुसार सिसीटिभी फुटेजमा दुई जना मास्क लगाएका मान्छे देखिएका छन् । उनीहरु ज्यान मार्ने उद्देश्यले आएको आशङ्कामा अनुसन्धान तीव्र पारेको प्रहरी उपरीक्षक खड्काले बताए । साँझ ६ बजेदेखि उनीहरुले वृद्ध बुवा आमा, श्रीमती, छोराछोरी र बहिनीसमेतलाई नियन्त्रणमा लिई बन्धक बनाइएकोमा राति १ बजेतिर हारगुहार माग्दै चिच्चाएरपछि भागेको पीडित खड्काले बताए ।
हेर्नुहोस् भिडियो
