नवलपुर, जेठ २ गते । माध्यमिक शिक्षा परीक्षा एसईईमा ४ जीपीए ल्याएका विद्यार्थीलाई नगद ७५ हजार रुपैयाँ सहित पुरस्कृत गर्दै खुसियाली साटासाट गरिएको छ । नवलपुरको देवचुली नगरपालिकामा रहेको नेपाल नमुना माध्यमिक विद्यालयले ४ जीपीए ल्याएका आर्जन अधिकारीलाई नगद ७५ हजार रुपैयाँसहित सम्पूर्ण विद्यार्थीहरूलाई सम्मान गरेको हो ।
विद्यालयमा आयोजित कार्यक्रममा विद्यालय व्यवस्थापन समितिका अध्यक्ष पवनकुमार बुढाथोकीको अध्यक्षता र शिक्षा युवा तथा खेलकुद शाखा, देवचुली नगरपालिकाका प्रमुख रामप्रसाद शर्माको प्रमुख आतिथ्यतामा बधाई सम्मान तथा शुभकामना कार्यक्रमको आयोजना गरिएको हो ।
कार्यक्रममा उत्कृष्ट अङ्क ल्याई एसइइ परीक्षा उत्तीर्ण गरेका विद्यार्थीहरूलाई बधाई ज्ञापन गर्दैै विद्यालयका प्रधानाध्यापक शिवप्रसाद देवकोटाले विद्यालयले विगतका वर्षहरूमा पनि उत्कृष्ट नतिजा ल्याइरहेको स्मरण गर्दै यस वर्षको एसइइको नतिजाले विद्यालयलाई उत्कृष्ट नतिजाको निरन्तरताका लागि थप जिम्मेवार बनाएको बताए ।
उनले नेपाल नमुना माध्यमिक विद्यालय नवलपुर जिल्लामा मात्र नभई गण्डकी प्रदेशमै उत्कृष्ट विद्यालय रहेको स्मरण गर्दै शिक्षकहरूको लगनशीलता, अभिभावकहरूको विश्वास, विद्यार्थीहरूको मेहनत र विद्यालय व्यवस्थापन समितिको उचित मार्ग निर्देशनले सफलता प्राप्त भएको बताए । उत्कृष्ट नतिजाको खुसियाली साटासाट गर्न विद्यालयमा पन्चेबाजा बजाएर नाचगान समेत गरिएको थियो ।
विद्यालय व्यवस्थापन समितिका अध्यक्ष पवनकुमार बुढाथोकीले सम्पूर्ण सरोकारवालाहरूको रचनात्मक सहकार्यले नेपाल माविले गौरवको नतिजा प्राप्त गरेको बताए । बधाई सम्मान तथा शुभकामना कार्यक्रममा नगरका जनप्रतिनिधि, शैक्षिक सरोकारका विभिन्न व्यक्तित्व, शिक्षक कर्मचारी, अभिभावक र विद्यार्थीहरूको उपस्थिति रहेको थियो। कार्यक्रमको सहजीकरण शिक्षक दीपक सुवेदीले गरेका थिए ।
यस वर्ष नेपाल नमुना माध्यमिक विद्यालयबाट एसइइ परीक्षामा १ सय २४ जना विद्यार्थी सहभागी भएका थिए । जसमा आर्जन अधिकारीको ४ जीपीएसहित ९७ जना विद्यार्थी ग्रेडेड भएका थिए । विद्यालयले ७८.२ प्रतिशत नतिजा प्राप्त गरेको छ ।
